Archivio dei filosofi del Rinascimento

/p. 17/ movere nequeat; per hanc enim hypothesin

ab Intelligentia movetur, quare coeleste corpus

esset culice et cimice longe deterius et ignobilius,

moventur enim haec, illud minime. Entis

autem nobilitas a motu potissimum proficiscitur,

utpote quia vitae est exordium. Alex. –

Quid igitur statuendum est? I. C. – Unicam in coelo

esse formam, quia unica in eo motrix facultas.

Alex. – Unde id assumis et praesumis? I. C. – In coelo

materiam esse iam supra probavimus, quae sola

cum non subsistat, necesse est (parcite barbaris vocibus,

viri elegantissimi) informari ab aliquo, sed

non ab Intelligentia (ea enim in materia nullo modo

est), verum ab anima, quae coelo dat esse, vitam

et motum. Alioquin, si in illa materia esset

forma non movens, nullam supra vermiculos,

imo nec supra crocodili stercus formulae dignatione

sibi arrogaret commendationem. Multo

minus materiae nobilitate primas sibi vindicaret.

Est enim eadem materia in omnibus, ut

omittam materiae essentiam esse, (liceat, precor,

mihi barbare loqui et bene sentire) receptivitatem,

quae passio est; in passione vero nulla consistit

excellentia. Alex. – Quam maxime mihi

arridet haec contemplatio! Sed a te sciscitari in votis

mihi est, a quo moveatur primus coeli orbis.

I. C. – Eum a Deo moveri videtur innuere Philosophus.[6]

Alex. – Id quidem perlegi, si bene

memini, in duodecimo Primae Philosophiae, veruntamen

illi non assentior. I. C. – Nec ego profecto.

Deus enim est simplex et in actu habet

omnia, in potentia nihil, Dominus est temporis