/p. 144/ magnetem trahere per animam, quare in ferro
magnes genuit magnetem, vivet autem
ferrum, non modo sua, sed etiam magnetis anima.
I. C. – Praeterea non ex omni parte magnes
attrahit; ea igitur parte, qua non trahit, non vivet
et tamen unum est mixtum uniforme. Partim
vivet igitur, partim non vivet, utrumque
sub viventis forma. Erit igitur quod non est,
quoniam hoc quod est per formam est; neque
ferrum magnetis pabulum est, diutissime enim
absque ferro illaesus consistit. Sed insanire
coactus sum a Cardano, ferri certam accepi
quantitatem, in qua magnetem servavi per
menses tres, nec tamen ferri scobem adinveni
leviorem; non igitur magnes depastus est illam,
sed potius graviorem, quod rubigine factum
auctuarium existimavi. Alex. – «At servatur –
inquit Cardanus – diu vegetus magnes in
ferri scobe». I. C. – Concedo, sed non quia eius
pabulum est, sed quia sic eius superficies ab aëre
non vitiatur, quare rubiginem non contrahit.
Alex. – Quid igitur Praeceptor tuus sentiebat?
I. C. – Asserebat ille omne appetens appetere
propter sui perfectionem, quare membra trahunt
ut nutriantur et elementa petunt convenientes
locos ad quietem. Sed ferri pabulo
non indiget magnes, absque illo enim servatur
integer; ergo non illud attrahit, sed movebitur
potius ferrum ad magnetem, tanquam
ad matricem suam, cuius abditis principijs
perficiatur, quemadmodum ad centrum Terra.
Est enim propius veritatem, ut ab interna