/p. 451/ ortum capessit rabies, cur a cane rabido morsi
aquam reformidant? Atque tunc incurabilem
esse morbum censuit Cardanus, iuxta illud Ovidij:
Nec formidatis auxiliatur aquis.
I. C. – Forsitan catulorum species in aquis eorum
oculis occurrit? Alex. – Hac de re a me interrogatus
aegrotus, negavit se quicquam in aqua
conspicere; eam tamen exhorrebat. I. C. – An
quemadmodum alij morbi eduliorum quorundam
abominationem inducunt propter
stomachi sive linguae indispositionem, ita
rabie afflictis accidit? Alex. – Non est verisimile;
sitiunt enim, humida expetunt, etsi pertimescant.
I. C. – An quemadmodum phantasia aliquarum
rerum memoriam excitat, quae timorem
solent incutere, ita et in rabie contingit?
Sane, ubi canis in rabiem concitatur, prae sanguinis
aestu extumescente lingua ac nervo, qui
illi subditus est, os spuma exitiali ac contagiosa
saliva redundat, quae contactu inficit dilaceratam
cutem; morsus igitur cum reminiscuntur,
extimescunt, utpote quia ab eo conflictantur.
Caninae ergo spumae quoque memoria erit
timoris, quippe ea laesi fuere; et quoniam aqua
idea spumae est, ideo fit illis reminiscentiae
obiectum atque timoris.