/91/ enim absque cognitione esse non potest.
2. Cum in universo tot tantaque grassentur
scelera, quae Deus neque expellit neque
medelam parat, asserendum est Deum haec
inferiora vel negligere omnino vel curare,
sed medelam malis vitiisque adhibere non
posse, quare erit impotens et per consequens
non Deus, vel nolle mederi et sic peccati
auctor dicetur. Si quis enim, ut Sacra nos docet
Pagina, errantem viderit et ab errore eripere
potest neque tamen eripit, homicida
est.
3. Vel Deus vult peccata vel non. Si vult,
ergo facit, dicente Scriptura: «Omnia quaecunque
voluit, fecit». Si non vult, eo igitur invito committuntur:
improvidus igitur vel impotens
nuncupandus, cum sit nescius vel efficere
non possit quominus suae rebelletur voluntati,
vel erit impius, cum nolit scelera et tamen
ab eis homines non praemuniat.
4. Deus et Natura de possibilibus semper
efficiunt quod est melius, ut dicit Aristoteles in i.
De partibus, in libro De gressibus animalium, et alibi.
At possibile et melius est nulla patrari scelera.
Deberet igitur Deus id praestare, sed non
praestat. Est igitur invidus et improvidus.
5. Qui causam damni dat, damnum fecisse
videtur, vulgata lege Qui occiderit, paragrapho In