Tommaso Campanella, Syntagma, p. 34
Hic totam philosophiam peripateticam in examen
adduxi, philosophorum
priscorum ac medicorum decretis simulque naturae placitis et
sensu
confutavi Pugnaculum istius auctoris, sic ut quem
defendere profitebatur,
hunc potius offendere palam ostenderim. Hic liber polemicus
impressus
est Neapoli in officina Horatii Salviani anno Christi 1590. Quo etiam
tempore
in domo marchionis Lavelli, Mario Tufo filio favente, scripsi
commentarios
duos, unum De sensu, alterum vero De investigatione rerum, et
conciones orationesque multas,
pro amicis doctoratus insignia adeuntibus,
composui. Ad istorum vero librorum De sensu rerum compositionem
movit me praesertim disputatio
habita in comitiis publicis, et seorsim
Joannes Baptista Porta, qui scripserat Phytognomoniam, ubi sympathiae
et antipathiae rerum dicebat non posse
reddi rationem, quando simul
suum librum iam excusum examinabamus. De investigatione autem scripsi,
quoniam videbatur mibi
Peripatetismus et Platonismus largam per
viam et non rectam ad rerum notitiam
perducere adolescentulos. Propterea
ex solo sensu et his, quae per sensum novimus,
redactis ad novem
genera sensibilium, putabam me facere posse, ut quilibet de
quacumque
re non per vocabula tantum, ut Raymundo Lullio mos est, quem
apud
Altum Montem examinaram, sed per sensibilia obiecta ratiocinari
posset; et
definitionem esse epilogum scientiae ostendi finemque, non
autem principium
cognoscendi, sed tantum docendi.