Tommaso Campanella, Syntagma, p. 36
Articulus 2
De tempore et occasione scribendi libros in iuventute et dum Romae
degerem
Scripsi postea quoddam Metaphysicae novae
exordium, in quo metaphysicorum
principia statuebam Necessitatem, Fatum,
Harmoniam. Item
philosophiam Pythagoricam carmine Lucretiano auspicatus eram,
motus
quidem ex Ocelli Lucani lectione et Platonicorum dictis. Anno autem
Domini 1592 Romam perrexi, fugiens aemulos accusantes: - Quomodo
literas scit cum
non didicerit? Nec tamen meliorem sortem nactus,
Florentiam accessi librumque De sensu rerum magno duci Ferdinando I
dedicavi. Deinde
Venetias ac Patavium petens, libros ibi editurus, dum
Bononiae haererem, furtim
sublati sunt omnes iam dicti libri et carmina
quaedam latina haud inepta; item Physiologiae primus liber disputationibus
contra omnes sectas
confectus, quem novemdecim alii libri excogitati
subsecuturi erant.
Sed nihil
hac iactura deterritus, postea Patavii coepi Empedoclis philosophiam
instaurare, et
scripsi novam Physiologiam iuxta propria principia
ad
Laelium Ursinum. Item, eiusdem Ursini iussu, Apologeticum de venarum,
nervorum et arteriarum origine et de pulsatione pro Telesii commentario
Quod animal universum et caetera, contra Andream Chiocum
medicum
Veronensem, qui adversus Telesium scripserat; misique hoc opusculum