Tommaso Campanella, Syntagma, p. 42
ut in Canticis nostris apparent; et artem metricam vulgaris
sermonis persimilem
Latinae, unde cuiusque syllabae quantitatem discere ac
servare
queas, certas per regulas patefeci: dedique hanc Ioanni Baptistae
Clario,
medico archiducis Caroli Romae, ac duobus iuvenibus Asculanis.
Anno
denique 1598 Neapoli Epilogum physiologiae atque ethices perfeci;
mox in Calabriam reversus, in patria mea Stylo composui Tragoediam
Mariae Scotorum reginae secundum poëticam nostram non
spernendam.
Item scripsi De auxiliis contra Molinam pro
Thomistis et diversa opuscula
in gratiam amicorum.
Articulus 3
De tempore et occasione scribendi libros in aetate virili et inter
molestias carcerum
Sed, istis omnibus absolutis, accidit mihi quod dicitur
a Salomone: «Cum
consummaverit homo, tunc incipiet; cum quieverit, operabitur»,
exsurgente
siquidem persecutione, quae tot alios tamdiu exercuit, ductus fui
Neapolim tanquam reus maiestatis. Ibique, dum librorum copia negabatur,
condidi
Latina Hetruscaque carmina multa de Sapientia prima et
Potentia, de primo Amore, de
bono, pulchro et similibus, quae omnia
scribebam cum dabatur furtive commoditas; ex
quibus septem libri facti
sunt attitulati Cantica, quorum
Tobias Adamus quaedam selecta iuxta ingenium
suum edidit sub Squillae Septimontani
nomine, additis annotationibus.