/p. 125/ et inde pilam in altum eveheret, idem in utraque
pila faceret; at non facit et commodius
poterat longe minore nixu adversus leviorem.
Non igitur pila aut vesica attollitur,
quia subit aqua, sed aqua subit, quia ab aëre
pila tollitur, subit autem, ne, pila decedente,
vacuum detur. Alex. – Perdocte. Sed cur inditum
calcis globum in aquam, ita ut non totus
submergatur, subit aqua nihilominus etiam
qua non circumstat? I. C. – Subtilissimam proponis
difficultatem. Alex. – Proposui alias doctissimis
viris, a quibus varias et subtilissimas excepi responsiones,
in quarum censu tuam constituere
in votis est. I. C. – Quaeso, sodes, illorum referas opiniones.
Alex. – Aliqui in Patavino Gymnasio dixerunt
paulo laxiores poros inesse calci, quos ubi
aqua attigit, illico abit inclusus aër, in cuius
locum, ne vacuum detur, succedit aqua et propterea
ascendit. I. C. – Petere ab illis debebas,
cur aquae accessu effugiat e foraminibus aër.
Alex. – Imo et petij et responderunt quia ab
aqua condensatur atque in angustias cogitur.
I. C. – Sic obijcere poteras: aër non nisi a frigido
densari valet, imbibitur autem in poris aqua,
non solum quae frigida est, sed et quae calida,
imo haec magis et citius. Alex. – Forsitan Pisanos
scholares adinvenies subtiliores in respondendo;
illi siquidem asserebant ab aquae pondere
expelli aërem atque arceri. I. C. – Quomodo id
fiat, ignorare me profiteor. Alex. – In ipsius – aiebant –
spongiosi corporis, in quo aër continetur,
superiori parte aqua inest, quae aëris quibusdam,