/p. 126/ portiunculis supernatat, aqua igitur
descendente, aërem inde propelli accidit. I. C. –
At enimvero, cum ad illam pervenerit lineam,
quae superimminentis aquae terminus est, quid
erit mox, quod rursus propellere possit aërem?
Alex. – Aërem – inquiunt – ab aqua pulsatum, alium
pellere atque hunc alium et sic successive.
I. C. – At cum totus aër ille conclusus a primo
per partem post partem tantum abscessit, quantum
est locus, quem aqua occupavit, tum non
ultra fiet impulsio partium aëris, sed cessabit; oportet
autem assignare aliud, quod aërem pellat
indesinenter, donec abscedat totus. Alex –
Veronenses Philosophi profugari asserunt ab
aqua aërem per species contrarias. I. C. – Alibi
reiecimus hanc fictitiam specierum facultatem.
Doceri nunc percuperem: quomodo aër
et aqua contraria sunt? Ex aëre aquam gigni
Naturae testantur opera. Alex. – Bononiensibus
Academicis sic effari libuit: calcem subit
aqua sursum tendens extra suum planum, quoniam
aër in calcis meatibus existens, in suo
loco non est, quare molitur exitum eoque
succedit aqua. I. C. – At aër non exit nisi diductis
parietibus, non cedunt parietes nisi subeunte
aqua, non ingreditur aqua nisi aëre discedente.
Praeterea dicant mihi perbelli Studiorum
Matris alumni: quomodo extra locum
suum aër est, si tota illa calx in aëris regione est?
Alex. – Parthenopeij scholares mellitissimi calcem
siccam esse testantur ac propterea repetere
quod deest humidum et attrahere igitur.