/p. 334/ et quas ad partes nervorum extrema pertinent,
in ijs enim sensus praestantissimus».
Alex. – At quare nemo seipsum titillat?
I. C. – «Quoniam – inquit idem – subita quaedam horripilatio
est, quod titillare dicimus, subita autem fit
titillatio et repentina, cum anima imparata et
non advertente conctatus fit, at sese tangente aliquo
semper parata et advertens anima est». Eximio quidem
Philosopho assentiri percuperem, nequeo
tamen, non solum enim ego observans et diu
etiam tactus promoveor, sed antequam tangar sola
imaginatione. Ratio huius rei ea mihi esse videtur;
quia nemo sibi est extraneus, itaque non
aeque patimur et certe etiam ex attrectatione
nostra, non nihil motus exoritur. Alex. – Cur in
maestitia expallescimus et frigescimus in externis
partibus? I. C. – Quia spiritus intro retrahuntur.
Alex. – At cur ita accidit? I. C. – Quia tristem
illam speciem in phantasia impressam fugiunt
atque in recessus intimos se inducunt. Alex. –
At si intus spiritus colliguntur, cur tristitia
cor refrigerat, concoctionem labefactat et pulsus
parvus, tardus, rarus et imbecillis evadit?
I. C. – «Quia spiritus – inquit Fernelius[8] – in cor solum
recurrunt, tanquam ad arcem, quare cor vehementius
premitur, et, strangulato calore, pene
obruitur». Laxa sane sententia, nam caloris
contractio concoctionis causa est, ut Hippocrates
docuit et experimentum suadet. Ventres enim
hyeme calidiores. Ego vero dicerem quod
ideo concoctio depravatur, quia spiritus alio