/p. 13/ Compositae igitur figurae in suas sunt resolubiles
portiones, quae habent commissuras manifestas;
id quod in circulo non est, ubique enim
est principium et finis, utroque tamen ille carens.
Alex. – Perbelle quidem. Verum enimvero
quae te movit ratio ut eam divinitatis titulo
adornares? I. C. – Quia ad infinitum accedit. Finitum
enim spatium est quod concluditur; infinitum
quod non terminatur. Quare finitur illud
quavis figura, hoc autem extra figuram per
lineam quoquo versum rectam. Nam circularis
in se recurret aut se secabit aut intra se desinet;
recta autem non. Quamobrem, ea quoque figura,
cuius termini omnes accedent propius ad
rectam lineam, participabunt aliquo modo naturam
illius infiniti. Huiusmodi autem est circuli
extremitas, quia una est, sicut linea recta una.
Angulares vero non una. Alex. – O me felicem,
qui Philosophorum Principem subtilissime
disputantem excipio! Sed perge, vir omni laude
sublimior, meque docere ne graveris, an coelum
habeat dextrum et sinistrum. I. C. – Pythagorici
affirmabant. Alex. – Quam ob causam?
I. C. – Quia alioquin esset animal imperfectum.
Alex. – Imo, si careret utroque, longe perfectius mihi
videretur. I. C. – Et ita est procul dubio; sinistrum
enim quid imperfectum est in animalibus,
dextro namque est imbecillius et ad opus
faciendum ineptius. Ideo volebat Plato suos
cives esse ambidextros. Itaque coelum, si animal
est, ut illi asserebant, perfectissimum, sinistro
caret et dextro igitur; sunt enim relativa.