/p. 208/ quibus generat et statuat et alat et conservet,
idem quoque initio fecisse videtur. Praeterea
quomodo mansissent in sicco pisces?
Profecto nunc sine interitu manere nequeunt.
Consecutio etiam argumenti longe distat a vero;
nam habitudines conservari similibus, aëre,
victu, exercitio alijsque et Galenus[4] scripsit et
ratio suadet. Alex. – Sed quid dices ad hoc? Argumentum
de generatione ad conservationem validissimum
est (lex enim eadem costituendi et conservandi:
conservatio namque est generationis quasi
perpetuatio quaedam). At generatio fit contrariorum
et concursu et occursu et pugna, ergo
et conservatio etiam fit e contrarijs. At locati
locus est conservatio, igitur et locus erit
locato contrarius. Aqua igitur, quae frigida est
et humida, cum sit piscium habitatio, necessario
erunt pisces contrariae naturae ac proinde
calidi et sicci. I. C. – Maior argumenti propositio
militat adversus te et Empedoclem. Si enim
eadem est generationis et conservationis ratio
et Natura genuit pisces in sicco, non debebat
e sicco transferre in humidum, conservationis
ergo. Minor falsa est. In generatione namque
omnia miscentur et unum fit, alioquin
non succederet generatio, tertium enim fieri
nequit, ex duobus actu existentibus, contraria
vero quam maxime distant et in unum coalescere
nequeunt. Non fit igitur ex contrarijs generatio,
quare nec mulus nascitur e contrarijs,
sed diversis, equino scilicet et asinino semine,