/p. 246/ violenta defertur cum ipso alimento ac spiritu in
foetus corpus effingitque rem similem ei, quam imaginatione
conceperat, additque plerumque membris
exterioribus; quoniam quae format infantem virtus
inutile existimat ac extra ordinem membrorum intus
illud retinere: ergo si propellere nequit, aboritur
infans. Quam ob causam et cur non semper talia
fiunt signa, manifestum est: et cur magno desiderio
rerum foetus aboriantur quandoque non, satis ex
his patet; nam in tenui appetentia nihil horum efficitur,
in valida autem aboritur, aut vestigium manet,
si iam foetus animum conceperit». Haec Cardanus
et subtilissime ille quidem. Sed illud abs
te scire velim: unde provenit insatiabilis praegnantium
appetentia? I. C. – A vitiosis frigidisque
humoribus atque acida pituita, qua ventriculus
imbutus est, quapropter et carbones,
putamina et cretam avide concupiscunt,
quod malum potissime invalescit, cum infanti
crines erumpere incipiunt, siquidem ob caloris
penuriam humores pituitosi minus coquuntur.
Alex. – At cur ubi praegnans inexplebili rei
alicuius desiderio tenetur et potiri nequit, foetum
in praesentaneum vitae discrimen adducit?
I. C. – An quia contracto moerore mulieris animo
spiritus vitales imminuuntur et humores,
foetui alendo destinati, alio avertuntur, quare
infans consueto destitutus alimento elanguescit
vel emoritur? Alex. – Ah! I. C. – Quid tibi
venit in mentem? Alex. – Dicam libenter, si tuam
mihi polliceris operam. I. C. – Ad omnia paratissimum
me offendes.